迴響—粵語文學期刊（第十期)

商品說明

統籌：鍾卓玲
出版社：scone publishing
出版日期：2021年4月
ISSN：2708-8146
頁數：56
規格：平裝

「愛就係選擇，選擇就係捨棄」今期嘅主題係「選擇」。前面講嘅愛指嘅唔係愛情，而係普遍意義嘅愛。「愛」係一種選擇，你愛香港，即係你選擇咗香港，噉你就冇得咁愛其他地方。你愛你嘅子女，噉你就冇得愛其他人嘅子女。因為人嘅時間、精力同埋資源係有限嘅。所以先會話「選擇就係捨棄」，因為你愛一樣嘢，即係捨棄其他嘅嘢。相反，當你個個都愛嘅時候，其實即係個個都唔愛。所以先會有「天地不仁，視萬物為芻狗」嘅道理。今期適逢陳冠中先生嘅《馬克思主義與文學批評》重印，我哋就搵咗洪麗芳同作者專訪，暢談佢寫呢本書嘅心路歷程。

 

《The Ghost of You》 － 陳煩

由於演化而嚟嘅認知功能，人對於「因果關係」係十分之敏感嘅，因為人要喺大自然中生存，學習係非常之重要。有時，我哋甚至會過分敏感，例如有啲人細個曾經喺遊樂場發生一啲唔愉快嘅經歷，就可能成世人都驚咗去遊樂場，就係呢種「學習」下嘅結果。Synchronicity就屬於呢種「學習」，明明只係「巧合」，但係因為我哋覺得成件事一定有意義嘅，所以就覺得有因果關係（物理上），或者因果關係之外嘅關係（例如緣份）。喺陳煩呢篇作品入面，個主角就遇到無數呢啲「巧合」。但係究竟呢啲巧合之間，真係有關係，定還是係因為個主角想佢哋有關係，所以先會睇到呢啲巧合，並且特別留意呢？

《如果地獄能選擇》－ 雨田明

根據舊時教會嘅標準，基本上現代百分之九十九點九九九嘅人死咗之後都會落地獄。大家又有冇想像過地獄會係點嘅呢？畢竟人世間都進步咗好多，地獄又會唔會進步呢？我就曾經睇過人話，地獄應該係無限排隊嘅輪迴嚟，噉先係最大嘅懲罰。冇錯，肉體嘅折磨雖然可怕，但係人最驚嘅就係無盡嘅嘢，因為呢樣嘢完全超出我哋嘅想像。今次雨田明為我哋帶嚟嘅就係一個關於地獄嘅故事。主角為咗避免落地獄，必須要勞動，建造新地獄，去獲得贖罪卷減刑。而且勞動獲得嘅金幣，唔係直接去買贖罪卷，而係以抽卡嘅方式去獲得，而建造地獄嘅材料又必須用金幣購買，而且如果抽卡抽上腦，用晒啲錢去抽卡，就真係會食西北風。究竟呢種贖罪係真係畀人贖罪，定係另一個地獄呢？就請你自己去睇喇。

《賣卜者言》－ 馮睎乾

咩為者信？信係一種選擇，每一次嘅信任都有代價。誠如文中所言：「耶穌信天父，係用自己嘅血實現天父嘅使命；菩薩信佛，係要自己覺悟成佛。普通人嘅信，同耶穌或菩薩嘅信，係兩件風馬牛不相及嘅事。」咩為之信？咩為之自由？咩為之選擇？係咪有命運呢樣嘢，就冇自由冇選擇呢？馮睎乾今次就用對話錄嘅形式嚟同你探討呢個問題。

《認命——我選擇去愛你定唔再愛你》－ 洛林

今次洛林評嘅歌係《俏郎君》。愛一個人係一件好大犧牲嘅事，因為愛一個人，即係要你冇咁愛自己，甚至要犧牲自己。例如，有啲情況之下，你要捨棄自己嘅原則。但係有啲關係，係你無論捨棄幾多嘢，都難以繼續落去，噉係咪應該要選擇放手呢？定係只係因為你哋兩個唔夠愛呢？首歌就話要放手，噉你嘅選擇又係咩呢？